A deputada socialista Paloma Castro lembrou en comisión que a comunidade educativa leva anos reclamando un estudo técnico do inmoble, pechado e sen uso dentro do propio recinto escolar. O ano pasado houbo que retirar a cheminea polo risco de que caese enriba do patio
Castro preguntou ao secretario xeral técnico de Educación, Manuel Vila, se a consellería vai considerar prioritaria esta actuación e se vai sentar coa dirección do centro e coa ANPA para consensuar os novos usos do edificio
A deputada do PSdeG Paloma Castro levou hoxe ao Parlamento de Galicia unha demanda que a comunidade educativa do CEIP Álvarez Limeses arrastra desde hai anos. Dentro do recinto do colexio hai un edificio pechado, a antiga vivenda dos mestres, que leva moito tempo sen uso e sen mantemento. A dirección do centro e as familias, a través da ANPA, queren dúas cousas: que a Xunta actúe xa sobre o inmoble e que planifique o seu futuro para poder integralo na vida do centro.
“Non pedimos nada extraordinario”, sinalou Castro, “xa que o edificio está dentro do patio do colexio. É unha petición sinxela, perfectamente factible, e daría resposta a unha necesidade de espazo que este centro vén sinalando desde hai bastante tempo”.
De feito, a comunidade educativa leva anos esixindo un estudo técnico que analice o estado da infraestrutura. De tanto insistir, algo se moveu: o ano pasado a Xunta retirou a cheminea, que corría risco de caer no patio. Xusto onde xogan os nenos e as nenas. Era o máis urxente e fíxose, pero aí quedou todo.
O que se reclama agora é un paso máis. O centro necesita ampliarse, e ese edificio pode dalo case todo feito: espazos para actividades complementarias, servizos para a comunidade educativa, un despacho para as ANPA. Sen mercar terreos nin levantar nada novo, porque o inmoble xa está alí.
En xuño, o pleno do Concello de Pontevedra aprobou por unanimidade unha moción neste mesmo sentido. Todos os grupos, sen excepción. “Cando ata os concelleiros do PP votan a favor, o razoable é que o goberno galego tome nota e se poña a traballar”, apuntou a deputada socialista.
Castro dirixiu dúas preguntas concretas ao secretario xeral técnico da Consellería de Educación, Manuel Vila. A primeira, se vai contemplar esta actuación como prioritaria dentro dos investimentos do seu departamento. A segunda, se vai reunirse coa dirección do centro e coa ANPA para consensuar os novos usos do inmoble.
“As familias do Álvarez Limeses non están pedindo un colexio novo”, rematou. “Piden aproveitar o que xa teñen dentro do patio, un edificio pechado que podería estar cheo de vida. A Xunta só ten que querer facelo”.
