- Paloma Castro rexistra unha proposición non de lei para que a Consellería do Mar exerza a súa tutela sobre a confraría e se determinen responsabilidades
A deputada socialista Paloma Castro rexistrou hoxe no Parlamento de Galicia unha proposición non de lei para que a Xunta inicie de maneira inmediata unha investigación sobre os audios atribuídos ao patrón maior da Confraría de Pescadores de Raxó, que ocupa tamén a vicepresidencia segunda da Federación Galega de Confrarías de Pescadores. Nas gravacións, difundidas nos últimos días, insúltase e humíllase a unha profesional do marisqueo da ría de Pontevedra.
Nos audios escóitanse insultos machistas e descualificacións persoais, xunto con expresións que lle desexan á afectada unha enfermidade grave e outras que a incitan ao suicidio. Castro fala duns feitos de gravidade extraordinaria. Ningún conflito entre confrarías nin ningún desacordo sobre a xestión dos recursos pode xustificalos nin relativizalos, e preocupan aínda máis por proceder, presuntamente, de alguén que ocupa postos de máxima responsabilidade na representación do sector pesqueiro galego.
A deputada lembra que as confrarías non son entidades privadas alleas ao control público. A Lei 9/1993, do 8 de xullo, de confrarías de pescadores de Galicia, defíneas como corporacións de dereito público e deixa claro que están suxeitas á tutela da Administración galega, que exerce a consellería competente en materia de pesca. O Decreto 8/2014, do 16 de xaneiro, regula o alcance desa tutela sobre determinados actos e acordos, incluídos os que afectan ao funcionamento dos órganos reitores. Por iso, sostén Castro, a Xunta non pode quedar á marxe nin eludir a responsabilidade que lle corresponde.
A iniciativa pide ao Goberno galego que esclareza os feitos e determine con todas as garantías as responsabilidades que se poidan derivar. Se é o caso, a Xunta deberá adoptar, dentro das súas competencias de tutela, as medidas que correspondan respecto do exercicio das funcións representativas da persoa implicada. Os socialistas reclaman tamén que a Consellería do Mar requira á Confraría de Raxó e á Federación Galega de Confrarías que examinen o sucedido e valoren as medidas estatutarias que procedan.
A proposta inclúe tamén medidas específicas contra o acoso e as condutas machistas en confrarías e federacións, con canles de denuncia seguras e confidenciais e protección fronte ás represalias.
Castro pon o foco nas mulleres do mar, que levan décadas loitando polo recoñecemento dos seus dereitos e por gañar espazos de representación nun sector historicamente masculinizado. Ningunha mariscadora, advirte, debería ter que escoller entre defender os seus intereses profesionais e preservar a súa dignidade.
Para a socialista, o compromiso contra o machismo ten que chegar tamén ás confrarías e ás federacións, e iso obriga a actuar cando unha muller é insultada ou humillada por facer oír a súa voz.
