- O secretario xeral do PSdeG respalda desde Monterroso o compromiso do Goberno de investigar ata o final o acontecido en Urda: “É o que lles debemos ás vítimas e ás súas familias, e tamén á cidadanía, que ten dereito a subir a un tren coa tranquilidade de que viaxa con todas as garantías de seguridade”
- O socialista tivo un recordo especial para os achegados da pontevedresa María Vázquez Nieto, que onte se confirmou que perdeu a vida na traxedia
O secretario xeral do PSdeG, José Ramón Gómez Besteiro, trasladou hoxe desde a feira de Monterroso todo o seu cariño e solidariedade ás familias e amizades das persoas falecidas no accidente ferroviario de Toledo, cun recordo especial para a da pontevedresa María Vázquez Nieto, que perdeu a vida na traxedia. Tamén expresou o seu apoio ás persoas feridas así como a todas as familias que aínda agardan noticias dos seus seres queridos. “Non me podo nin imaxinar o que deben estar a sufrir”, recoñeceu.
Besteiro lembrou que Galicia sabe desde Angrois o que supón vivir de preto unha traxedia ferroviaria e defendeu que as vítimas e as súas familias merecen saber que pasou, por que pasou e se se podía ter evitado. Por iso apoiou o compromiso do Goberno de España de levar a investigación ata o final”
“Hai que esclarecer todo o sucedido e, se houbo fallos ou neglixencias, esixir as responsabilidades que correspondan», sinalou. Besteiro insistiu en que a investigación debe permitir tamén identificar e corrixir calquera deficiencia para reforzar a seguridade ferroviaria.
“É o que lles debemos ás vítimas e ás súas familias. E tamén á cidadanía, que ten dereito a subir a un tren coa tranquilidade de que viaxa con todas as garantías de seguridade”, sinalou.
